Sujet 2026 vo dr PlauschWaggisPartei

Jetzt isch gnueg – mir laischte Wiiderstand!

Mir Plauschwaggis luege genau ane. Mit Humor und Satire zeige mir, wo s in Basel und dr Schwiiz knirscht. D‘Fasnacht isch für uns nid eifach nur e Fescht – sie isch au d’Stimm vom Volk, e Bühni für Kritik und Härzbluet für d’Stadt. Drum gründe mir kurzerhand unseri eigeni Partei und wehre uns gege folgendi Pünggt.

Gsundheit
Im Spital fehlts an Personal und drum laufe alli am Limit. S wird zvill Gäld für Prunk usgeh und glychzytig gits zwenig Gäld für die Persone, wo sich um alli kümmere. Mir wänn, dass die vorhandene Ressource sinnvoller igsetzt wärde.

Verkehr
Baustelle, Stau und Stillstand überall. Mir wänn meh Planig, weniger Chaos und e besseri Infrastruktur.

Bildig
S Tablet im Sack heisst no nit schlauer im Chopf. Mir wänn meh Inhalt, weniger Bürokratie und chlineri Klasse.

Landesverteidigung
Sicherheit isch wichtig – aber nit um jede Priis. Mir wänn, dass weniger für Panzer und Kampfjets usgeh wird und drfür mehr für alles zur Verfüegig stoht, wo im Volk wichtiger isch.

Schwiiz und Europa
Neutral im Sturm – aber nit naiv. Mir wänn, dass d’Schwiiz stark, eigenständig und glaubwürdig bliebt.

Öffentlige Verkehr
Volli Drämmli, Verspötige und Störige sorge für Fruscht. D‘BVB isch für Basel wichtig. Mir wänn drum, dass d‘BVB künftig so zueverlässig wie d‘SBB wird und nit so bliebt, wie s die Dütschi Bahn immer isch.

Tierschutz
Dr Umgang mit Tier, Huustier, Nutztier und Wildtier wird emotional diskutiert. Mir wänn, dass d’Froog, wie ernscht me s Tierwohl im Alldaag und in dr Politigg wyrgligg nimmt, ärnschthafter diskutiert wird.

AHV
Die reduzierti Izahlige durch d’Teilzytler und die erhöhte Usgoobe für die 13. Ränte füehre drzue, dass dr Räntetopf immer dünner wird. Mir wänn, dass die entsprächende Hebel in Bewegig gsetzt wärde, damit sich langfristig niemerts Sorge um sini Ränte mache muess.

Was mir alles kritisiere und wo mir Wiiderstand laischte, gsehsch am Wage und no genauer stohts uf unserem Zeedel.

Zeedel

Gedangge vom Künschtler zur Sujetumsetzig

Bi de Plauschwaggis wird’s das Joor politisch, denn sie gründe e Partei und laischte Wiiderstand denn brisanti und wichtige Themene git’s in der Schwyyz allerhand…

Si hän prominänti Unterstützig – so dr Singvogel, wo für meh Rächt für d’Vicher hofft, denn är wött s’ganz Joor dusse si

Dr Fährimaa kämpft um e besseri Landesverteidigung und will ändlich e Flugzügträger uf em  Babe Rhyy

Dr Dumm Peter wött dr noi Vorsteher vom Erziehigsdepartemänt wärde – dank KI

Dr Schwoobekäfer reklamiert, denn är het kei Platz me im 8-er Drämmli

Und wär wött uf kei Fall Chloorhiener uf em Schwyyzer Täller - natürlich dr Heiri

Die G’Salzene weible für meh Swissness - mit em beriehmte Knorrli

Dr Doggtor FMH verlangt tieferi Pharma-Priise und gäbt defür sogar sini Rolex und sini zwei Goldvreneli

Und zu gueter letscht, hofft s’Rollaator Röösli uf e Ränte für ihre Änggel, dr Ruedi

Gib doch au Du i däm Joor de Plaschwaggis mit ihrem Wage Nummere 68 Dini Stimm,
Und dängg dra, wenn de am 08. März nid gosch go abstimme, denn isch das schlimm…

Unsere Fahrplan für dr Cortège

Mäntig

12:00 Iträffe bi dr Isegass
13:30 Abfahrt Richtig Claraplatz
14:10 Pause bi dr Räbgass/Kirchgasse
14:50 Abfahrt Richtig Wettsteiplatz
15:40 Pause bim Brunngässli
16:20 Abfahrt Richtig Barfüsserplatz
17:30 Isegass - Affefüetterig

Mittwuch

12:00 Iträffe bim Fischmärt/Spiegelhof
13:30 Abfahrt Richtig Märtplatz
14:10 Pause bim Bankverein
14:50 Abfahrt Richtig Wettsteibrugg
15:30 Pause bim Wettsteiplatz
16:15 Abfahrt Richtig Claraplatz
17:15 kurzi Pause Dreikönig/Spiegelhof
17:30 Abfahrt Richtig Barfüsserplatz
18:00 Steinevorstadt - Affefüetterig

S Goldige Räppli